ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានស្នើទៅដល់គណៈរដ្ឋមន្ត្រីថ្មីបន្តការយកចិត្តទុកដាក់ចំពោះមន្ត្រីចាស់ៗ តាមរយៈការផ្តល់ជាទីប្រឹក្សានៅតាមក្រសួងស្ថាប័នរបស់ខ្លួន។
សម្ដេចថ្លែងបែបនេះនៅក្នុងពិធីជំនួបជាមួយនឹងសមាជិករាជរដ្ឋាភិបាលអាណត្តិទី៦ និងសមាជិករាជរដ្ឋាភិបាលអាណត្តិទី៧ នៅវិមាន៧មករាក្នុងខណ្ឌចំការមន រាជធានីភ្នំពេញ ល្ងាចថ្ងៃទី១០ ខែសីហា ឆ្នាំ២០២៣នេះ។
តាំងតែពីដើមរៀងមកគណបក្សប្រជាជនកម្ពុជាតែងឱ្យតម្លៃ និងប្រមូលផ្ដុំបញ្ញាវ័ន្ត អ្នកចេះដឹង មានសមត្ថភាព និងទេពកោសល្យទាំងអស់ឱ្យចូលរួមកសាង និងបម្រើជាតិនិងប្រជាជន។ ក្រោមពាក្យស្លោក «រក្សាចាស់ បង្កើនថ្មី» ធ្វើឲ្យគណបក្សប្រជាជនពោរពេញទៅដោយមនុស្សដែលមានទេពកោសល្យនិងមានសមត្ថភាពដែលបានជួយអភិវឌ្ឍន៍ប្រទេសជាតិចាប់តាំងពីគ្មានអ្វីសោះក្នុងឆ្នាំ១៩៨០ រហូតមានការអភិវឌ្ឍន៍ដូចបច្ចុប្បន្ន៕
